top of page
  • Writer's pictureBook Fest

Գևորգ Թումանյան


Բանաստեղծ, մաթեմատիկոս։ 2023 թվականին «Պոեզիա» անվանակարգում արժանացել է Գրքի երևանյան միջազգային վեցերորդ փառատոնի գրական մրցույթի «Առաջին մրցանակ»-ին: 1995 թ․ ավարտել է ԵՊՀ կիրառական մաթեմատիկայի ֆակուլտետը։ 1995-1997 թթ․ ծառայել է ՀՀ ԶՈՒ-ում։ Դասավանդել է Գյումրու ճարտարագիտական քոլեջում։ 2005 թ․-ից դասավանդում է Գյումրու համար 41 դպրոցում։ Ստեղծագործությունները թարգմանվել են ռուսերեն, պարսկերեն, վրացերեն, ֆրանսերեն, սերբերեն և այլ լեզուներով։ Պոեզիայի հինգ ժողովածուների հեղինակ է, այդ թվում՝ «Վրիպումներ» (Գրանիշ, 2021), «Ունայնիկներ» (Գրանիշ, 2019), «Գևորիկներ», (Արմավ, 2017) և այլն։



*

հիմա մտաբերում եմ ընդամենը երկու պոետի Ռեմբոյին և Շեկոյանին սակայն հաստատ խիզախները շատ են նրանք ինչ-որ պահի հասկացան որ այլևս անելիք չունեն պոեզիայում և թողեցին չափածո գրելը թեպետ անզուսպ Շեկոյանը մի փոքր խորամանկեց և սահունորեն ներթափանցեց արձակի անվերջանալի թավուտները պայծառացմանս ջինջ պահերին թվում է աշխարհը ինձ նման պոետ դեռ չի ունեցել իսկ ընդհանուր առմամբ արդեն սպառվել եմ որքան դժվար է ախ խիզախ լինելը


*

անքնություն

ախր ես միայն կնոջս գիշերային խռմփոցներին էի իբր սովոր /խռովկանիս ցերեկայինները շատ քիչ եմ լսել / հիմա էլ էս անուշ լուսումութին ներքևի հարկից ռուս կենվորն է հռնդում ըշտը եղբայրասպան պատերազմից չփախչեիք ձեր անվերադարձորեն ցնդող անփոխարինելի պապայի հրամանով էրթայիք ուկրաինական հողը ավելի արգավանդ դարձնեիք դե լավ

շուլուխ եմ անում խոզ չեմ էկել էկել եք գլխիս վրա տեղ ունեք ավելի ճիշտը մեկ հարկ ներքև վարձով տանը տեղ ունեք իսկ հռնդացող ընկեր ռուս քո վե՞ջն է որ կինս խռովել է ինձնից ու առավոտյան գործի եմ գնալու նորից ճմրթված վերնաշապիկով կամ ճարս կտրած սվիտեր եմ հագնելու անուշ երազներ տեսնող ընկեր ռուս իսկ գիտե՞ս որ կինս ամեն ամիս է ինձնից խռովում անհրապույր ընկեր ռուս իսկ գիտե՞ս որ աշխարհի ամենավավաշոտ ամենակնամոլ ամենահրապուրիչ աչքի ընկնող տղամարդը ես եմ ամենագետ ընկեր ռուս ազնվորեն կասե՞ս կամ ավելի ճիշտը կհռնդա՞ս կինս երբևէ դադարելո՞ւ է հալևորիս խանդելուց իհարկե իհարկե դու էլ չգիտես դե հռնդա շուն-շան որդի ահա ձեռքս կնոջս գոգավորություններն է շոշափում իբր ջղայնացած իբր քնել է ուզում ձեռս մեղմիվ հետ է շպրտում ախր ես գիտեմ չի դիմանալու ընկրկելու է ախր չէ՞ որ աշխարհի ամենավավաշոտ ամենակնամոլ ամենահրապուրիչ աչքի ընկնող տղամարդը ես եմ

մի երկու օրից վերնաշապիկներս կարդուկվեն

շուն-շան որդի ընկեր ռուս


*

կայծակնային շախմատ ինչ ազգություն ասես հանդիպում է ռուսներն են մի տեսակ պակասել առաջ լիքն էին վայրագորեն ծփում էին պարտվելիս անխղճաբար հայհոյում ուկրաինացիք կապտագույն դրոշով են սգո նշան է երևի ինչ սրտով են խաղում չեմ հասկանում

միգուցե փախածներն են ոխերիմ կենաց-մահու թշնամիներս թուրքերն են ադրբեջանցիները մի քանի անգամ դաղել լացացրել եմ դե իհարկե է նրանք էլ ինձ մի շեմ կա չեմ կարող հաղթահարել հաղթածս դիրքերը փայլուն չեմ իրագործում դանդաղում եմ կամ պարտվում կամ ոչ ոքի եմ ավարտում ես ինչ սրտով եմ խաղում չեմ հասկանում


*

մերոնք որոշել էին որ ես ինչ-որ բանից վախեցած եմ ու մորքուրս ինձ տարավ իր գործի տեղ վախս բռնելու վախ բռնող կինը ինձ կռնակի վրա պառկեցրեց ոտքերս ծալել տվեց ու սկսեց վրես գիրք կարդալ առաջին անգամ լսեցի Նարեկի անունը վրես Նարեկ էր կարդում կրունկներիցս մի անսովոր և հաճելի ջերմություն բարձրացավ մինչև գոտկատեղս մի քառասուն տարի էդ աղոթքներն ինձ զորավիգ էղան հիմա մարմինս օրվա մեջ մի քանի անգամ իրենից դուրս ցնցվում է չեմ հասկանում կամ վախեցած եմ կամ ծերությունը էսպես է սկսվում

* ըստ մերոնց քանի որ բախտս երկար ժամանակ չէր բացվում վրես չար աչք կար ու մեր տուն մոմ թափող մի կին էկավ համատեղության կարգով էդ կինը մեր փողոցի ավլող-թափողն էր մոմ թափելը Նարեկ կարդալ չէր ու ես ոչ մի արտասովոր բան չզգացի հետո Սուրբ Հովհաննեսի մատուռ բարձրացա հետո անցա Հացիկ գյուղի ծակ քարի միջով ու Գագիկ Սարոյանի փոխ տված թաշկինակը

կապեցի երազանքի կամ թե ցանկության ծառին հետո ամուսնացա ինձ աչքով չտամ բայց չար աչքերին ես չեմ հավատում * հորս մարմինը դիահերձարան տանելու համար մաքուր պիտի լիներ մեն-մենակ էի լվանում սրբում անտանելի շոգ էր շտապում էի դիմակով էի քրտինքս ինձ ունենալու քրտինքը հորս մարմինն էր ոռոգում


540 views

Recent Posts

See All

Comments


bottom of page